Канон святому мученику Вонифатию

Песнь 1

Ирмос: Тристаты крепкия,/ Рождейся от Девы,/ безстрастия во глубине души тричастное по топи, молюся,/ да Тебе, яко в тимпане,/во умерщвление телесе/ победное воспою пение.

Святый мучениче Вонифатие, моли Бога о нас.

Усердным помыслом подвигом ревнивав доблих страдальцев,/ пострадал еси крепко и змия умертвил еси страдании твоими живоносными,/ страдальче Вонифатие, святых Ангелов собеседниче.

Святый мучениче Вонифатие, моли Бога о нас.

Видев на земли вражию лесть, излиянну люте, доблий страдальче,/ душу распалив желанием Божественнейшим,/ вшел еси, в тризнище небоязненным, преблаженне, мудрованием.

Святый мучениче Вонифатие, моли Бога о нас.

Мудростию Божественною просвещаемый, блаженне,/ немудрыя враги объюродил еси, Христа возвещая,/ дебельством плоти уподобльщася,/ имже явитися восхоте, Вонифатие, мучениче многострадальне.

Пресвятая Богородице, спаси нас.

Богородичен: Гору Божию, юже провиде Даниил,/ скинию мысленную, Марию Чистую, славы священие,/ трапезу, Божественный хлеб вмещшую,/ вей вернии, единомудренно воспоим.

Песнь 3

Ирмос: Яко неплоды роди от язык Церковь,/ и многое в чадех изнеможе сонмище,/ чудному Богу нашему возопиим:/ Свят, еси Господи,

Святый мучениче Вонифатие, моли Бога о нас.

Якоже возжелел еси, славне, свободу Вышнюю,/ от ига работы избавляешися,/ страстен честным поревновав, славне,/ иже за милосердие раба бывшаго.

Святый мучениче Вонифатие. моли Бога о нас.

Плотских вышший явлься мудрований изменением Божественным,/ внезапу всяк прилег лютых претерпел еси, радуйся,/ мучениче Вонифатие.

Святый мучениче Вонифатие, моли Бога о нас.

Тебе самого, отверглся еси,/ и к подвигом и борением врага изшел еси,/ Креста оружием укрепився, и, победитель быв,/ прославился еси, мучениче Вонифатие.

Пресвятая Богородице, спаси нас.

Богородичен: Себе Самого истощи,/ Отеческих не истощив во чреве Твоем недр, пресущный Бог/ и Твой Сын бысть, Всенепорочная,/ спасая человечество.


Кондак, глас 4

Подобен: Вознесыйся:

Изыде к приятию страстотерпческих мощей и страждущих законно веры ради зря,/ показал еси мужески крепость свою,/ устремився на страсти исповеданием во Христа,/ Иже прием почесть победы твоего страдания,/ Вонифатие, присно моли за ны.


Седален, глас 4

Подобен: Вознесыйся:

К сословию послан мучеников, мученик был еси истинен,/ пострадав за Христа крепчайше, всехвальне,/ бремя же, блаженно, отдался еси верою/ пославшей тя, Вонифатие блаженне./ Но прилежно моли прияти всем согрешений совершенное прощение.

Слава, и ныне. Богородичен:

Грехолюбив сый, молю Тя, безгрешнаго Бога рождшую,/ вземлющаго грехи мира, Пречистая,/ многогрешную душу мою ущедрити/ и грехи моя многая очистити:/ грешным бо Ты еси очищение, и спасение верным, и заступление.

Крестобогородичен:

Из Безначальнаго Отца рожденнаго,/ напоследок Тя плотию Рождшая, на Кресте висяща зрящи, Христе / увы Мне, Любезнейший Иисусе, вопияше:/ како славимый яко Бог от Ангел,/ от беззаконных ныне человек Сыне, хотя распинаешися? Пою, Тя, Долготерпеливе.

Песнь 4

Ирмос: Любве ради, Щедре, Твоего образа/ на Кресте Твоем стал еси,/ и растаяшася языцы:/ Ты бо еси, Человеколюбче,/ крепость моя и хваление.

Святый мучениче Вонифатие, моли Бога о нас.

Ублажая страждущих терпение,/ подобием, мучениче, честных страданий/сим уподобился еси, богомудре пребогате.

Святы и мучениче Вонифатие, моли Бога о нас.

Идый верою к мучеников Божественному сословию, блаженне,/ тебе самаго желающе бремя досточудное, богомудре, отдал еси.

Святый мучениче, Вонифатие, моли Бога о нас.

Очищен, якоже злато, мучениче, язв горнилом,/ чистейший явился еси,/ нося Зиждителя страстей изображение.

Пресвятая Богородице, спаси нас.

Богородичен: Девство по Рождестве запечатанно познавающи, Отроковице,/ неска-занно рожденнаго Слова из боку Твоею верно величала еси.

Песнь 5

Ирмос: Просвещение Твое, Господи, низиосли нам, и от мглы прегрешений разреши ны, Блаже,/ Твой мир даруяй.

Святый мучениче Вонифатие, моли Бога о нас.

Яко светозарная возшел еси звезда от запад,/ и зашел еси, мучениче, страданьми, терпеливно,/ абие к западном возсиял еси, озаряя концы.

Святый мучениче Вонифатие, моли Бога о нас.

Мученически подвизался еси,/ ногтей терзания, острыми, мучениче, тростьми сбодаемь,/ и лукаваго жала верно притупляя благодатию.

Святый мучениче Вонифатие, моли Бога о нас.

Вражия изнемогоша, богомудре, на тя коварствия,/ ибо к Богу воззрением неуклонным/ плотския раны, якоже/ безплотен, терпел еси.

Пресвятая Богородице, спаси нас.

Богородичен: Скверны всякий омый, Дево, душу мою, вопию Ти,/ и спаси мя, Чистая,/ Яже истиннаго Бога Спаса на земли воплощшая.

Песнь 6

Ирмос: Возопи, прообразуя погребение тридневное,/ пророк Иона, в ките моляся:/ от тли избави мя, Иисусе, Царю сил.

Святый мучениче Вонифатие, моли Бога о нас.

Биемый ранами плотскими уязвил еси безбожныя./неисцельно недугующия неведением,/ и болящим явился еси врач, страдальче Вонифатие.

Святый мучениче Вонифатие, моли Бога о нас.

Возвышаемь к Богу, блаженне, прилогом подвигов,/ враги невидимыя разразил еси/ и низриновенным помощник, страстотерпче, был еси.

Святый мучениче Вонифатие, моли Бога о нас.

Влачимь по земли, якоже камень многоценен, страдальче,/прелести низложил еси утверждение,/ верных же сердца наипаче верою утвердил еси.

Пресвятая Богородице, спаси нас.

Богородичен: Купина Тя проображаше, Всенепорочная, первое,/горящи и никакоже опаляема, Пречистая,/ибо, якоже она, не опалилася еси, Бога воплощши.

Кондак, глас 4

Подобен: Явился еси:

Священие непорочное самовольно Тебе привел еси, Иже от Девы тебе ради родитися хотящему,/ святе венценосче, премудре Вонифатие.

Песнь 7

Ирмос: Авраамстии иногда в Вавилоне отроцы/ пещный пламень попраша,/ песньми взывающе:/ отцев наших Боже благословен еси.

Святый мучениче Вонифатие, моли Бога о нас.

Колен не преклонив истуканным,/во искушение верглся еси величайшее, истинно, мучениче, в пещь,/в нейже орошаемый, благодарствовал еси Христу во веки.

Святый мучениче Вонифатие, моли Бога о нас.

Разорити крепость твоего исповедания тщася, /льстивомудренный во внутренняя твоя клокочущее олово немилостивно вливает,/ но яве посрамися.

Святый мучениче Вонифатие, моли Бога о нас.

Посечен быв усердно в честную твою главу, врага льстиваго многокозненную главу отсекл еси твоего мужества мечем,/мучениче Христов, богомудре.

Пресвятая Богородице, спаси нас.

Богородичен: Да гласы подо6ающими песнословлю Тя, Отроковице,/ страстей мя избави молитвами Твоими,/ бед же и скорбей и лукавых человек,/ озлобити мя ищущих.

Песнь 8

Ирмос: Избавителю всех, Всесильне,/ посреде пламене благочествовавшия,/ снизшед, оросил еси/ - и научил еси пети:/ вся дела, благословите, пойте Господа.

Святый мучениче Вонифатие, моли Бога о нас.

Полезно твое делая спасение Христос, Вонифатие, / взыскающа мощей добропобедных мучеников, тя укрепляет,/ еже верно взыскал еси сам быти.

Святый мучениче Вонифатие, моли Бога о нас.

Блаженней госпожи блаженно сокровище подался еси, 6лаженне,/имже обогатившися, пояше веселым сердцем:/вся дела, благословите, пойте Господа.

Святый мучениче Вонифатие, моли Бога о нас.

Со тщанием славная жена, воздвигши храм священнейший,/тя в нем положи, сущий Божественныя Троицы храм,/страстотерпче Христов Вонифатие.

Святый мучениче Вонифатие, моли Бога о нас.

Умертвився за любовь Зиждителя, умерщвляющаго страсти тлетворный,/ животворяй молитвою твоею ясно вопиющия:/ вся дела, благословите, пойте Господа.

Пресвятая Богородице, спаси нас.

Богородичен: На Тя, Чистую, Пребожественный, низшед, якоже весть,/ воплотися и человеки обожи, песнопоющия, Дево:/ вся дела, благословите, пойте Господа.

Песнь 9

Ирмос: Ева убо недугом преслушания/ клятву вселила есть;/Ты же, Дево Богородице,/прозябением чревоношения мирови Благословение процвела еси./ Тем Тя вси величаем.

Святый мучениче Вонифатие, моли Бога о нас.

Видевши тя, бремя священное, моли Бога о нас, пиющи, Приснопомнимая:/раба послах тя, блаженне, господина истинна приемлю,/работы мя зол избавляюща твоими благоприятными мольбами.

Святый мучениче Вонифатие, моли Бога о нас.

Яко крин, во удолиих мысленных процвел еси, мучеников, Вонифатие,/ якоже финике, возвысился еси,/ яко кедр, познался еси миродыханен,/ явился еси избранный, яко кипарис,/ благовонствуя души наша.

Святый мучениче Вонифатие, моли Бога о нас.

Днесь память твоя нам возсия, страстотерпче,/ якоже солнце, сиянием Божественных дарований,/ просвещающи души поющих тя, страстей же мглу отгоняющи,/ мучениче богомудре всеблаженне.

Святый мучениче Вонифатие, моли Бога о нас.

Яко солнце от запад, возсиял еси/и восточнаго града достигл еси,/идеже пострадав и смертию зашед, к жизни востекл еси/и Рим светлый достигл еси,/сего ограждая мольбами твоими.

Пресвятая Богородице, спаси нас.

Богородичен: Светом мя озари Твоим, Всенепорочная,/ во тьме содержимаго греховней, Богородице,/ и подаждь во дне ходити Божественных повелений, Богоневесто,/ яко да пою Тя, Всепетую.

 

Молитва
ко святому мученику Вонифатию

О многострадальный и всехвальный мучениче Вонифатие! Ко твоему заступлению ныне прибегаем, молений нас, поющих тебе, не отвержи, но милостивно усльши нас. Виждь братию и сестры наша, тяжким недугом пианства одержимыя, виждь того ради от матере своея, Церкви Христовой, и вечнаго спасения отпадающия. О святый мучениче Вонифатие, коснися сердцу их данною ти от Бога благодатию, скоро возстави от падений греховных и ко спасительному воздержанию приведи их. Умоли Господа Бога, Его же ради страдал еси, да простив нам согрешения наша, не отвратит милости Своея от сынов Своих, но да укрепит в нас трезвение и целомудрие, да поможет Своею десницею трезвящимся спасительный обет свой до конца сохранити во дни и нощи, в нем бодрствующе и о нем добрый ответ на Страшное Судилище дати. Приими, угодниче Божий, молитвы матерей, о чадех своих слезы проливающих; жен честных, о мужех своих рыдающих, чад сирых и убогих, от пианиц оставленных, всех нас, к иконе твоей припадающих, и да приидет сей вопль наш молитвами твоими к Престолу Всевышняго даровати всем по молитвам их здравие и спасение душ и телес, наипаче же Царство Небесное. Соблюди нас от лукаваго уловления и всех козней вражиих, в страшный час исхода нашего помози прейти непреткновенно воздушные мытарства и молитвами твоими избави вечнаго осуждения. Умоли же Господа даровати нам к Отечеству нашему любовь нелицемерную и непоколебимую пред врагами Церкви Святыя, видимыми и невидимыми, да покроет нас милость Божия в нескончаемые веки веков. Аминь.

МОЛИТВА 2-Я

О, святый страстотерпче Христов, воине Царя Небеснаго, земная сладострастия презревый и к Горнему Иерусалиму страданием возшедый, мучениче Вонифатие! Услыши мя грешнаго, приносящаго от сердца молебная пения, и умоли Господа нашего Иисуса Христа простити вся моя согрешения, в ведении и в неведении мною содеянная. Ей, мучениче Христов, образ покаяния собою показавый грешным! Буди ми на злаго сопротивника диавола твоими молитвами к Богу помощник и заступник; много бо поревахся избегнути сетей его лукавых, но удицею греховною уловлен и крепко влачимь от него, не могу избавитися, аще не ты предстанеши ми, во обстояниих горькая терпящему, и колико покушахся покаятися, но ложь пред Богом бых. Сего ради к тебе прибегаю и молюся: спаси мя, святче Божий, от всех зол твоим предстательством, благодатию же Всесильнаго Бога, в Троице Святей славимаго и покланяемаго, Отца и Сына и Святаго Духа, ныне и присно и во веки веков. Аминь.

Главная страницаПредыдущая страница

 

© Анонимные Алкоголики, Смоленск, 2003

Hosted by uCoz